European Market Infrastructure Regulation, eller EMIR – regelverket, er ei forordning som blei innført i EU i 2012, men som først tredde i kraft i Norge 1.juli 2017. Regelverket blei revidert med EMIR Refit i 2019. EMIR har som mål å redusere eventuell risiko ved å overvake og regulere derivathandel ved å auke innsynet i finansmarknaden. Regelverket kjem som ein konsekvens av finanskrisa i 2008 og er retta mot bedrifter.
EMIR kan grovt kan delast inn i desse hovuddelane:
Sjølvklassifisering
Kvar motpart i ei derivatkontrakt skal klassifiserast enten som ein finansiell eller ein ikkje-finansiell motpart. Det er kvart enkelt føretak sitt ansvar å sørge for riktig klassifisering, og dette skal gjerast ovanfor motparten i derivathandelen. Føretak som handlar med Sparebanken Sogn og Fjordane må klarere kva kategori dei tilhøyrer ovanfor oss.
Finansielle motpartar (FC) vil vere føretak som bankar, forsikringsselskap, verdipapirføretak, kredittføretak og pensjonskassar. Ikkje-finansielle motpartar (NFC) er alle andre føretak. NFC er delt opp i to underkategoriar, NFC+ og NFC-. For å klassifiserast som ein NFC+ må føretaket sine derivatposisjonar (som ikkje er handla med formål om sikring) overstige gitte terskelverdiar. Det er lite truleg at norske føretak vil hamne i denne kategorien, då det krevst signifikante nominelle beløp for å overstige terskelverdiane. Som utgangspunkt vil derfor føretak som ikkje klassifiserast som FC høyre heime i kategorien NFC-. Denne kategorien er gjenstand for mindre regulering enn andre klassifiseringsgrupper. Når det gjeld FC vart det med Emir Refit innført også to underkategoriar basert om ein er over eller under dei nemnde terskelverdiane og såleis har clearingplikt eller ikkje, henhaldsvis, FC+ og FC-.
Risikoreduserande tiltak
Finansielle føretak og NFC+ blir pålagt å stille sikkerhet for derivatkontraktar gjennom ein sentral motpart med formål å redusere motpartsrisiko. Føretak som er klassifisert i kategorien NFC- vil ikkje bli omfatta av denne plikta.
For derivathandlar til klassifiseringsgruppe NFC-, er motpartane i staden pålagt å setje i verk risikoreduserande tiltak. Som eit ledd i dette, sender banken stadfesting på alle handlar kort tid etter inngåing. Her skal kunden kunne reklamere raskt dersom stadfestinga ikkje er i tråd med sine eigne noteringar. I tillegg vil banken ved årskiftet sende ut rapport for porteføljeavstemming. Denne har oversikt over alle uteståande derivatkontraktar og gjeldande marknadsverdi.
Transaksjonsrapportering
EMIR slår fast at alle derivat skal rapporterast til eit autorisert transaksjonsregister. Finansielle tilsynsmyndigheiter i dei ulike landa vil få innsyn i dei handlane som er gjort. Begge motpartar må rapportere transaksjonen, samt eventuelle endringar i avtaleforhold og avslutting eller utløp av avtalen. Rapporten vil innehalde informasjon om partane i handelen, og spesifikk informasjon som identifiserer den individuelle transaksjonen.