Vidsyn er endeleg fullfinansiert - skal skape trivsel og identitet

I forsiktig haustsol var styret i Stiftinga Bystien, entreprenør, to lokalbankar, ordførar og prosjektdeltakarar samla ved Hafstadkleiva for å markere at prosjekt Vidsyn endeleg er fullfinansiert og første spadetak berre er nokre veker unna.

Siste beløpet som mangla kjem frå Sparebanken Sogn og Fjordane og er på 1,2 millionar kroner.

John Helge Lunde, styreleiar i Stiftinga Bystien, uttrykte si takksemd for støtta prosjektet har fått.

– Vi er veldig glade for at Sparebanken Sogn og Fjordane kjem inn med denne gåva og gjer at vi no kan gå i gang. Eg vil også takke Sparebanken Vest som var dei som fekk ballen til å rulle på finansieringa og som til saman har støtta oss med 1,75 millionar. Det er flott at to sterke lokalbankar ikkje berre er konkurrentar, men også kan samarbeide og løfte lokal initiativ i lag. Utan lokalbankane hadde ikkje dette blitt noko av, seier Lunde.

– Det er veldig kjekt for oss som lokalbankar at vi kan gå saman å få til noko. Førde er heldig som har to så store aktørar som Sparebanken Sogn og Fjordane og Sparebanken Vest. Dette blir nok heller ikkje siste gongen vi samarbeider, seier banksjef i Sparebanken Sogn og Fjordane Lars Solnørdal.

Stiftinga Bystien har forvandla Hafstadkleiva til ein veldig populær tursti.

– Trappene er i seg sjølv i eit smykke, men vi har følt at vi har mangla noko. No tar vi det eit steg vidare med Vidsyn, som vil bli eit flott landemerke, ein selfieplass og ein lett tilgjengeleg plass å ta med folk. Sogn og Fjordane er gode på natur og fjell, men vi har mangla litt på det urbane. Eit slikt utsiktspunkt kombinerer naturen og det urbane sentrum, fortel Lunde.

– Bergen har Fløien, Ålesund har Aksla, Molde har Varden. No får Førde Vidsyn. Dette trur eg blir veldig populært fordi det er så lett tilgjengeleg, seier Solnørdal.

SELFIEPLASS: Styreleiar John Helge Lunde nytta høvet til å teste ut selfiepotensialet ved utsikten saman med kvar sin banksjef. –Eg har aldri tatt ein selfie i mitt liv før, uttrykte han.

– Dette er ein gledens dag at vi endeleg har fullfinansiert Vidsyn. Slike attraksjonar er så viktig for å skape trivsel for oss som bur her, og det er med å skape ein attraktiv kommune. Vi høyrer byggearbeid frå sentrum medan vi står her, og vi ser kvar dag at det skjer ting og at vi kjem nærmare målet, seier ordførar i Sunnfjord Jenny Følling.

Vidsyn er forma av sivilarkitekt Christina Kvamme. Prosjektet er budsjettert til å koste rundt 3,78 millionar kroner, med Sunnfjord kommune som byggherre. Entreprenør Aase & Hegrenes står klare til å sette i gong arbeidet i løpet av hausten, og målet er at Vidsyn er ferdig tidleg neste vår.

Pengegåva på 1,2 millionar kjem frå overskotet til Sparebanken Sogn og Fjordane som blir forvalta av hovudeigaren Sparebankstiftinga Sogn og Fjordane.