No kan du trene med Funkygine!

Opprinneleg skulle Jørgine kome til Førde i mars 2020. Vi veit alle kva som overskygga alt anna på den tida, og treningsarrangementet måtte utsetjast. At det skulle gå tre år før vi kunne invitere på nytt, var det ingen som hadde sett for seg. Men no kjem ho endeleg!

13. september blir det trening i Førdehuset, og 14. september står Sognahallen i Sogndal for tur. Det er Sparebanken Sogn og Fjordane som i samarbeid med Førde IL Fotball og Kaupanger IL arrangerer treningsøkta, heilt gratis for alle som vil vere med.

Er du påmeldt treninga?
Her finn du praktisk informasjon til treninga i Førde.
Her finn du praktisk informasjon til treninga i Sogndal

(Påmeldinga til treninga i Førde er no stengt)

Jørgine Massa Vasstrand er for mange godt kjent som treningsinfluensar. Ho har gitt ut treningsbøker og kokebøker, og har også lansert fleire matvareprodukt. Ho har deltatt i «Skal vi danse», og vore programleiar for «Norges tøffeste». Ho har hatt sin eigen TV-serie med «Funkyfam», og har i tillegg deltatt i Femundløpet med den påfølgande TV-serien «Jørgine – Alene med flokken». No er ho klar for å trene sunnfjordingar og sogningar.

– Eg gler meg veldig til å vere instruktør i Førde og Sogndal. Eg er glad for at banken ikkje avlyste, men heller valte å utsette. Sjølvsagt kjedeleg at det skulle gå så lang tid, men når vi har venta så lenge så har forventningane både hos meg og deltakarane fått bygge seg opp litt ekstra. Eg er veldig klar, seier Vasstrand.

– No har vi venta på dette i tre år, då er det klart vi gler oss til å gjennomføre og samle treningslade folk i lag med ei råsterk Funkygine, seier Gunn Aase Moldestad, marknadssjef i Sparebanken Sogn og Fjordane.

Moldestad fortel at dei som var påmeldt og på venteliste i 2020 har fått tilbod om å behalde plassen sin. Resterande plassar blir no fylt opp til dette populære arrangementet. Totalt blir det opp mot 800 personar fordelt på dei to dagane som får trene med Vasstrand.

– Vi trur dette er eit arrangement som vil fengje mange. Vasstrand er kjent for mange, og treninga vil vere med eigen kropp som vekt. Derfor kan ein tilpasse timen slik at alle kan få seg ei godt økt uavhengig av kva nivå ein er på, seier Moldestad.