Tre nye år som generalsponsor

Sparebanken Sogn og Fjordane held fram med suksessen som generalsponsor for Malakoff, og har signert avtale for tre nye år frå 2023.

–Det er fantastisk kjekt og viktig for Malakoff å ha på plass ei ny avtale med Sparebanken Sogn og Fjordane for tre nye år. Dette sikrar grunnlaget for mange nye strålande festivalopplevingar, seier Arnt Ivar Naustdal, festivalsjef for Malakoff.

I 2020 signerte banken den første treårige perioden som generalsponsor. Med utbrotet av koronapandemien same år, vart perioden litt annleis enn først tenkt. Men trass i restriksjonar og nedstengingar, blei det utvikla nye konsept som suksessen Live Laga turnéen i 2020 og miniMalakoff i 2021.

– Gjengen bak Malakoff har vist enorm evne og vilje til å satse offensivt i åra med pandemi og nedstenging, og alt vi klarte å skape dei to åra førte til stor stoltheit over samarbeidet både internt i banken og hos publikum, seier Moldestad.

Sommaren 2022 vart ein fullskala Malakoff festival gjennomført for første gong sidan 2019. Det førte til både læring og iver til å vere med vidare.

– Dei tre åra vi har bak oss har vore lærerike og gjeve oss ny innsikt i korleis vi kan aktivere eit sponsorsamarbeid og gitt oss svært god profilering. Vi har aktivt brukt kompetansemiljøa hos begge partar til å tilføre nye og spennande tankar og kompetanse. Det har derfor vore heilt naturleg å vidareføre samarbeidet, seier Moldestad.

Sidan festivalen blei til 2003, har han vakse til å bli ein av dei største musikkfestivalane og merkevarene i landet med over 30 000 besøkande i året.

Både festivalen og banken har stort fokus på ungdom og unge vaksne og på verdiskaping og utvikling av lokalmiljøet.

– Malakoff er basert på mykje dei same kjerneverdiane som banken. I mange år har festivalen også peika ut ein tydeleg retning innan miljø og berekraft. Både avfallshandtering, gjenbruk, haldningsskapande aktivitetar overfor publikum og tett samarbeid med lokal ungdom for å nemne nokre, er med å forsterke årsaka til at vi stolt identifiserer oss med festivalen, seier Moldestad.

Med bakgrunn i tre spennande år, med nytenking og utvikling, er målet å framover bruke tida i lag året rundt for å aktivt skape nye aktivitetar både før, under og etter festivalen som kjem både festivaldeltakarar, frivilligapparatet, lokalsamfunnet og banken til gode.

– Vi har allereie begynt å jobbe fram nye idear og arbeid med å utvikle festivalen vidare. Vi gler oss til tida framover, avsluttar Moldestad.