GOD STEMNING: Bjarte Heggheim (i midten) viser fram parkeringsplassen som gåva på 200 000 i 2019 har vore med og finansiert. Med seg på omvisninga hadde Jan Arve Frøyset (t.h.) og Odd Kjetil Tonning i Sparebanken Sogn og Fjordane ei ny gåve på 200 000 som skal gå til stiprosjektet opp fjellet i bakgrunnen.

11. november 2021 – Kristian Helle

Du har kanskje vore på Eggenipa? Om ikkje har du sikkert sett den spisse toppen frå E39 på veg frå Gloppen til Jølster. No skal stien opp til det ikoniske fjellet utbetrast.

Som ein del av finansieringa til prosjektet Eggenibberåsa får dei nye 200 000 kroner Det betyr at prosjektet har fått totalt 400 000 kroner i gåve frå Sparebankstiftinga Sogn og Fjordane. Desse pengane kjem frå overskotet til Sparebanken Sogn og Fjordane.

– Dette er eit formidabelt bidrag. Veldig bra! No er vi 600 000 kroner frå å vere fullfinansiert, så vi er nesten i mål med budsjettet, seier Bjarte Heggheim, styreleiar i Eggenibberåsa AS.

OVERREKKING: Med Eggenipa i bakgrunnen fekk Bjarte Heggheim (styreleiar i Eggenibberåsa AS) gåva på 200 000 kroner. Odd Kjetil Tonning (banksjef privatmarknad i Nordfjord) til venstre og Jan Arve Frøyset (kontorleiar i banken på Sandane) til høgre.

Tilkomstvegen og parkeringsplassen sto klar i 2020, og til våren skal dei i gang med å utbetre sjølve stien opp til Eggenipa, som ligg 1338 meter over havet. Heggheim seier at dei håpar at denne stien er ferdig om to år. Jobben skal gjerast av entreprenørar, i tillegg til at dei siste 600 meterane skal utførst av sherpaer. Og ikkje minst skal veldig mykje jobben gjerast på dugnad.

– Det er veldig mykje dugnad som vert lagt ned her, og det er ein av grunnane til at vi synast det er kjekt å vere med og støtte. Dette er eit godt folkehelseprosjekt, og det er positivt både for lokalbefolkninga og for turismen, seier Odd Kjetil Tonning, Sparebanken Sogn og Fjordane sin banksjef i Nordfjord.

– Vi har rekna 6000 dugnadstimar i prosjektet, seier Heggheim.

– Det er enormt. Det er utruleg mykje! skyt Jan Arve Frøyset inn. Han er kontorleiar i banken på Sandane.

– Ja, det er mykje. Men så er dei her i Breim godt kjende med å stille på dugnadsarbeid, så det er veldig bra, seier styreleiar Heggheim.

I 2019 vart det 2000 besøkande på Eggenipa, medan det i 2020 var 4000.

– 2020 var kanskje ikkje heilt representativt grunna korona, då trafikken i friluftsområde var litt større enn normalt. Men vi hamna på det same talet i år også, og det er nok ein realisme i at det vil auke framover, seier Heggheim.

Han får støtte av banksjef Tonning:

– Det er heilt klart at fleire og fleire har fått auga opp turisme innanlands. Populære turistmål blir nok godt besøkt også framover, og vi er sikre på at dette gjeld Eggenipa også, seier han.

– Det er fleire som har vore her som også har gått Besseggen. Og dei meiner at turen til Eggenipa er vel så fin, avsluttar Heggheim.

MAJESTETISK: Frå E39 er det ikkje vanskeleg å få auge på Eggenipa som ligg 1338 meter over havet.