Her vert EM-klare Erik overraska med stipend

– Ja, eg var heime og slappa av med familien etter ein lang 17. mai. Dette var veldig overraskande og kjekt!

Desse orda tilhøyrer fotballspelaren Erik Hovden Flataker. 18-åringen frå Allmenningen er spiss på Sogndal, men sjølv i eit tett kampprogram fekk han smetta inn ein tur heim igjen til Nordfjord på nasjonaldagen. Når feiringa gjekk mot slutten troppa Sissel Wik opp med ein sjekk verdt 50 000 kroner. Dette betyr at Erik Hovden Flataker er vinnar av Furorestipendet!

Stipendet er gitt av Sparebankstiftinga Sogn og Fjordane, og pengane kjem frå overskotet til Sparebanken Sogn og Fjordane.

– Å vinne Furorestipendet er veldig kjekt! Det betyr at eg har gjort noko riktig og er blitt lagt merke til, seier Furore-vinnaren.

Erik starta karrieren i moderklubben Skavøypoll, og etter eit kort opphald i Måløy vart han i 2020 henta av Sogndal. I år nyt han stor tillit hos trenar Tore André Flo og har fått starte mange kampar på laget som ligg heilt i toppen av 1. divisjon.

– For min del har sesongen til no vore ein opptur. Vi spelar god fotball, og eg trivast veldig godt ute på bana i lag med dei eg spelar med. Vi har fått ein god start på sesongen og er godt i rute, seier Erik.

Medan 17. mai er Norge sin nasjonaldag, er 16. mai fotballen sin festdag. Og på denne dagen opplevde nordfjordingen noko han aldri kjem til å gløyme. I Sogndal sin 1-0-siger over Hødd scora han nemleg kampen si einaste scoring.

– 16. mai-kampen kjem eg til å hugse. Det var veldig stort, spesielt med så mange vener og familie som såg på, fortel han.

Til sommaren er det klart for noko anna den unge spissen kjem til å hugse. Då skal Erik representere Norge i G19-EM i Malta.

– Det er ikkje mange som får vere med på eit EM i fotball, så det vert eit høgdepunkt!

– Vinne heile greia! Vi har spelarar og laget til det om vi er skikkeleg skrudd på. Vi har allereie slått ut Frankrike i kvalifiseringa, som er eit av dei beste laga. Og tidlegare har vi spelt jamt mot Portugal og slått England, forklarer han.

Når det gjeld meir langsiktige mål svarer Sogndal-spelaren følgande:

– Først og fremst er det å rykke opp med Sogndal, og å spele så masse som mogleg. Så får vi sjå kva det bringer, men målet er sjølvsagt å spele i ein av toppligaane, seier fotballspelaren.

Sissel Wik, kunderådgjevaren som delte ut stipendet, seier at det var veldig kjekt å avslutte nasjonaldagen med å formidle det glade bodskap.

– Det var stor stas å få komme heim til Erik og familien og overraske han med Furorestipendet. Og ikkje minst er det eit veldig fortent stipend han får! Allereie som 18-åring er han ein viktig spelar for Sogndal, og det er kjempeimponerande. Det blir veldig kjekt å følge Erik vidare, og vi ønsker han masse lukke til både i EM til sommaren og karrieren elles, seier Wik.