Sjå alle som har fått gåve i Kinn, Bremanger og Selje

I mai har det vore gåvedryss i desse kommunane, og over 20 lag og organisasjonar i Kinn, Bremanger og Selje får i desse dagar pengar inn på kontoen sin. Gåvene er gitt av Sparebankstiftinga Sogn og Fjordane, og pengane kjem frå overskotet til Sparebanken Sogn og Fjordane.

– Eg må verkeleg seie at eg er kjempeimponert over alle dei gode prosjekta og all innsatsen som vert lagt ned her. Eg har fått gleda av å besøke nokre av desse no i mai, og det har vore fantastisk kjekt, seier Ole Aukland, Sparebanken Sogn og Fjordane sin banksjef på privatmarknaden i regionen.

Vårens første overrekking gjekk til veteranbåten M/S Atløy som fekk 250 000 kroner. Desse pengane skal vere med å finansiere nytt og moderne navigasjonsutstyr.

– Det er kjærkomne pengar for hobbylaget vårt. Vi legg ned kring 15 000 dugnadstimar i året, men om bord i ein veteranbåt er det ikkje alt som kan gjerast med gratis arbeidsinnsats. Materiell og utstyr kostar. Og denne gongen var det eit svært viktig rekrutteringsprosjekt vi trong midlar til, sa Sander Ødelien i «Atløys Venner» til Firdaposten då gåva vart delt ut.

Fleire av gåvene i år går til ulike turstiar, mellom anna i Selje. Der held dei på med eit stort sherpatrapp-prosjekt til Tarvaldseggja, og til dette har dei fått 100 000 kroner.

– Denne typen anlegg er utfordrande økonomisk, men vi er heldige som har mange gode støttespelarar rundt oss. Det gir oss inspirasjon til å halde fram med prosjektet, sa Atle Solheim i Selje IL til Fjordenes Tidende om gåva.

Totalt vart over to millionar kroner delt ut til 20 lag og organisasjonar i dei nemnde kommunane. I tillegg vart det også siste veke delt ut ei gåve frå Sparebankstiftinga Sogn og Fjordane til Studiesenter Kysten. Denne gåva på 2,5 millionar vart delt ut av administrerande direktør Trond Teigene og direktør bedriftsmarknad Roy Stian Farsund på Aksello sitt frukostmøte i Florø. Denne gåva kan du lese om her.

– Eg vil gjerne gi ros til alle som gjer ein formidabel innsats for lokalsamfunna våre. Når det er så mange gode prosjekt som det er, så er det ei stor glede for oss å bidra med gåver. Tusen takk og gratulerer til alle gåvemottakarar, seier Ole Aukland.