Over to millionar til prosjekt i Årdal og Sogndal kommune

– Dette har vore ei veldig bra runde med mange gode prosjekt i området vårt. Det er mange som jobbar kjempegodt for lokalsamfunna sine, og det er det kjekt å få vere med å støtte.

Det seier Laila Ruud, Sparebanken Sogn og Fjordane sin banksjef på privatmarknaden i Sogn. Ho er blant dei som i vår har delt ut gåver til gode formål i kommunane Årdal og Sogndal.

Totalt 2 265 000 kroner er delt ut i gåver her. Gåvene er gitt av Sparebankstiftinga Sogn og Fjordane, og pengane kjem frå overskotet til Sparebanken Sogn og Fjordane.

To av dei heldige mottakarane er Stadheimgarden Grendalag og Kjørnes Velforening. Desse var tidlegare i mai innom banken i Sogndal og fekk kvar si gåve.

– Dette er eit godt bidrag til vidareutvikling av aktivitetsparken vår. Bustadområda er avhengig av frivillig innsats for utvikling, og vi er heilt avhengig av eksterne midlar for å få ting til å skje. Desse midlane skal gå til lyssetting av aktivitetsparken slik at den kan brukast heile året, seier Turid Skrede i Kjørnes Velforening etter å ha fått sjekken på 80 000 kroner.

For Stadheimgarden Grendalag var det Anita Instefjord som tok imot deira sjekk på 75 000 kroner.

– Det å få midlar gjev ein boost og motivasjon. For å lage gode lokalsamfunn og gode og levande møteplassar for store og små så treng vi litt draghjelp. Desse pengane går til lavvo, leikeapparat og plantar og tre, seier Instefjord.

Gåveutdelingane tjuvstarta då IL Jotun feira 100 år i slutten av mars. Det var også her vårens største gåve i Sogn vart delt ut. Skigruppa til IL Jotun kan nemleg juble for 500 000 kroner til ny trakkemaskin.

– At innsatsen og dugnadstimane vi legg ned vert verdsett på denne måten, er svært rørande, men og motiverande for vidare drift, sa Audun Hestetun, leiar i skigruppa, til Sogn Avis etter tildelinga. Også Porten skreiv om denne.

Nesten like stor gåve fekk Sogn Terrengsykkel då dei under eit frukostmøte som banken arrangerte på Kaupanger i mai fekk tildelt 450 000 kroner. Denne gåva skal vere med å finansiere nye sykkelstiar.

– Vi i banken vil gjerne takke alle i regionen vår for den fantastiske innsatsen som vert lagt ned rundt omkring for lokalsamfunna våre. Gratulerer til alle gåvemottakarane, og så gler vi oss allereie til hausten og ny runde, seier Laila Ruud.